Fossvélar hófu losun á fyllingarefni í Langöldunámu í mars 2025 og efnisvinnslu fljótlega í kjölfarið. Þar hafa starfsmenn Fossvéla framleitt um 250.000 rúmmetra af efni til vegagerðar á árinu, þar á meðal styrktarlag, burðarlags- og klæðingarefni.
Efnið hefur annars vegar verið nýtt til uppbyggingar og styrkingar um 13 km veghluta frá slóðum að Áfangagili, skammt norðan Landmannaleiðar, að mótum Þjórsárdalsvegar og Sprengisandsleiðar. Hins vegar hefur verið framleitt efni fyrir um 20 km af vegum sem lagðir hafa verið innan framkvæmdasvæðisins við Vaðöldu í tengslum við uppbyggingu fyrsta vindorkuvers landsins.